A roh tơpui tơno, Kăn xiâm pơkuâ kong têa Ireland mơnhên nhuô̆m tíu cheăng ƀă hnoăng cheăng dêi Việt Nam a kơpong châu Á – Thái Bình Dương; tối rơdêi péa tơnêi têa ai hên tíu ki tơdâng tơplâ tơbriêt châ tơniăn krê hdroâng mơngế ƀă ôh tá ai kơvâ ki lâi, tơdroăng pơxá ki lâi ki péa pâ ôh tá chiâng vâ tơpui tơno, tơrŭm cheăng.

Tung tơkŭm po tơpui tơno, péa pâ hiăng tơpui tơno trâu ‘na mâu tơdroăng gâk kring kơpong rơtế rơhêng vâ ‘nâi plĕng môi tiah tơdroăng Ukraine, Trung Đông, kơbông krếo rêm pâ gâk kring kuăn pơlê, tơkŭm tơpui tơno, tơleăng tơplâ tơplong ƀă troăng hơniêp lĕm tiô luât lâp plâi tơnêi ƀă mâu pơkâ ki xiâm dêi Luât Khu lâp kong têa; môi tuăn thăm tơrŭm a mâu hneăng hôp tơpui tơno hên troăng môi tiah ASEAN – EU, Khu lâp kong têa tung hên kơvâ cheăng.