Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơtroh troh mâu kăn ƀô̆, nhân viên Kơ koan teăng mâ rơtế tâi tâng mơngế Việt Nam a Mông Cổ rơkong kơ-êng tá hiâm mơno, rơkong rơkâu ivá, hơniâp lĕm rơtế mâu tuăn pâ hơtôu má môi ing pơlê xiâm Việt Nam.

Pôa Tô Lâm tối ăm ‘nâi, roh lăm pôu pêi cheăng troh a Mông Cổ roh kố ai kơnâ kal khât, tơkŭm po drêng tơrŭm cheăng pơla péa tơnêi têa dế a hneăng mơnhông lĕm má môi. Pôa Tô Lâm pơkâ Kơ koan teăng mâ Việt Nam a Mông Cổ mơnhông hnoăng pro tơdjêp pơla péa tơnêi têa ƀă pơla mâu khu xiâm, kơvâ cheăng péa pâ, tơrŭm pêi pro châ tơƀrê mâu tơdroăng môi tuăn dêi Khu râ kăn pơkuâ péa tơnêi têa tung mê ai Tơbleăng tơdjuôm ‘na mơjiâng tơrŭm cheăng tâi tâng Việt Nam – Mông Cổ; tơrŭm mơdêk châ tơƀrê tơrŭm dêi pó, tơrŭm cheăng pơla péa tơnêi têa tung tâi tâng mâu kơvâ cheăng.