A rôh trâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối mâu tơdroăng mơnhên tối dêi Ngế xiâm chêh tôm xo rơkong Khu lâp kong têa ‘na tơdroăng a kong têa ê ƀă mâu tơdroăng ki pơloăng mơnúa ki hên troăng ki lâp plâi tơnêi dế trâm. Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnê tơdroăng kum tŏng gum dêi mâu khu tơrŭm Khu lâp kong têa a Việt Nam tung tơdroăng ki hbrâ ví ƀă khía mơhot, têa kân lân lu.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Ngế xiâm chêh tôm xo rơkong Khu lâp kong têa pơtối tơmâng ngăn mơdêk mâu kơvâ cheăng tơrŭm môi tiah pơhlêh on tơhrik, pơhlêh ngiât, pơhlêh kơxô̆, mơjiâng khu pơkuâ pơkuâ kơxô̆ ƀă hên ki ê tung mê, tơmâng ngăn troh ki pơxúa dêi mâu kong têa dế mơnhông, tung mê ai Việt Nam.

Pôa Gutteres mơnê ƀă mơnhên tối khât tơdroăng ki veăng tơpui tối dêi Việt Nam a mâu kơ koan ki kal, xuân môi tiah tung tâi tâng mâu kơvâ cheăng ki châ kơjo gum dêi Khu lâp kong têa, malối cho ‘na rak vế hơniâp lĕm, pêi pro mâu Pơkâ mơnhông krá tơniăn, hbrâ ví ƀă kong prâi pro pơhlêh.