A roh trâm mâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối mơnê tá hiâm mơno troh pôa Biden, Kăn xiâm pơkuâ kong têa Mih ‘na tơdroăng hơlêm păng ‘nâng tơdroăng kơtê i hiâm pôa Nguyễn Phú Trọng, Kăn xiâm pơkuâ hnê ngăn Đảng, tơdrêng amê mơnê tơdroăng tŏng kum teăm tơdrêng dêi Chin phuh Mih ‘măn ăm kuăn pơlê Việt Nam tung roh kong mêi khía mơhot Yagi pơla kố nah.

Péa kăn xiâm pơkuâ tối phiu ro mâu tơdroăng châ tơƀrê klêi môi hơnăm pêi pro Khu tơrŭm cheăng tâi tâng, tơtro ƀă pói vâ ƀă ki pơxúa dêi tŭm péa pâ, kum rak hơniâp lĕm, tơniăn, tơrŭm cheăng, mơnhông dêi kơpong ƀă lâp plâi tơnêi. ‘Na mâu tơdroăng lâp plâi tơnêi ƀă kơpong rơtế tơmâng, péa cho Kăn xiâm pơkuâ péa pâ môi tuăn péa pâ thăm tơrŭm cheăng a mâu hneăng hôp tơpui tơno kơpong ƀă lâp plâi tơnêi, tung mê ai tơdroăng cheăng ASEAN, Khu tơrŭm Mekong – Mih, APEC, Khu lâp kong têa... kum tung mơdêk tơpui tơno, hơniâp lĕm, tơniăn, tơrŭm ƀă mơnhông a kơpong ƀă lâp plâi tơnêi.