Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnê mâu vâi pú hiăng mơdoh chôu troh veăng ai mâ a rôh trâm, hlối tối mơnê, ƀriê hlo tơdroăng ki môi tuăn, hiâm mơno pâ nhuô̆m dêi mâu vâi pú kŏng san, pú hmâ, kuăn pơlê Mih ƀă pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă kuăn pơlê Việt Nam ing mâu hneăng.

Pôa Tô Lâm, Kăn xiâm pơkuâ hnê ngăn Đảng, kăn xiâm hnê ngăn tơnêi têa hiăng tối ‘na mâu tơdroăng ƀlêi chiâng dêi Việt Nam klêi kơ’nâi vâ chê 40 hơnăm hơ’lêh nếo, mâu tơdroăng ki hiăng ƀlêi pro klêi tung tơbleăng pêi pro mâu tơdroăng pơkâ dêi Hneăng hôp kân 13; tối ‘na Hneăng hôp kân 14 dêi Đảng Kŏng san Việt Nam apoăng hơnăm 2026 kô cho rôh ki kal, hdró chal pơhlêh dêi tơná dêi Hdroâng mơngế Việt Nam a troăng prôk môi tuăn troh chuh ngiah xã hô̆i.

Drêng kố, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơkâu ƀă mơnê diâp Mê dái tơrŭm tơroâ ăm mâu ngế krê ai hên ivá veăng gum kơhnâ, veăng kum mơdêk tơrŭm cheăng pơla kuăn pơlê péa tơnêi têa.