Kơxo hâi lơ 22/9, tiô chôu kong têa Mih, Hneăng hôp khu râ kăn xiâm Tung la ngiâ hiăng pơxiâm po kân krip a Tíu pêi cheăng Khu lâp kong têa a New York, Mih ƀă veăng amê ai kơdrâm khu râ kăn xiâm mâu kong têa, mâu khu tơrŭm lâp plâi tơnêi ƀă kơpong, rơtế kăn teăng mâ mâu khu tơrŭm cheăng pa kong Chin phuh, khu cheăng khoa hok, khu pơkuâ liăn ngân ƀă khu tê mơdró.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkuâ djâ khu râ kă xiâm tơnêi têa pin veăng Hneăng hôp. Xông tơpui a hneăng hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối ăm ‘nâi; Việt Nam phiu ro mâu hlá mơ-éa ki kal châ tơbleăng a Hneăng hôp ƀă pói vâ mâu tơdroăng xiâm mơ-éa ki kal kô châ pêi pro kơtăng, châ tơƀrê. Việt Nam pói vâ Khu lâp kong têa ƀă hnoăng cheăng tíu xiâm, pơkuâ ƀă tơkŭm po lâp plâi tơnêi pơtối ai mâu tơdroăng veăng kum kal khât tâ, châ tơƀrê tâ, ó rơdêi tâ tung pơkâ mơdât xâu xía ƀă tơdroăng mơnhông rĕng, krá tơniăn dêi lâp plâi tơnêi sap ing hâi kố.

Việt Nam tơkêa kô veăng kum hên, châ tơƀrê tung mâu tơdroăng mơ-eăm tơdjuôm vâ mơjiâng lâp plâi tơnêi hơniâp lĕm, mơnhông tơdâng tơ’mô xua tơdroăng rêh ối hơtô, hơniâp lĕm dêi kuăn mơngế.