Ing tơdroăng tơmâng mâu tơdoăng hnê tối, veăng tơpui a rôh hôp ƀă trâm mâ hên grup pêi cheăng kâ ki má môi, pôa Tô Lâm, Kăn xiâm pơkuâ hnê ngăn Đảng, kăn xiâm hnê ngăn tơnêi ăm ‘nâi tơdroăng ki tơpui rơkê khât dêi khu mơdró Mih vâ rơtế bă dêi rơpó mơnhông po rơdâ tơrŭm cheăng ‘no liăn pêi cheăng ƀă Việt Nam tung la ngiâ, pakĭng mê, hlối púi vâ khu mơdró Mih pơtối mơ-eăm tâ nếo vâ chiâng khu ‘no liăn cheăng ki kân má môi a Việt Nam, pơtối rak ki tơ’lêi hlâu xua mâu rôh ing tơdroăng tơrŭm cheăng ôh tá pơrah dêi rơpó, nhoăm dêi rơpó ƀă péa pâ rơtế ai pơxúa vâ tơxâng ƀă tơdroăng tơrŭm tung tŭm tơdroăng cheăng dêi péa tơnêi têa.

Vâ ai tiah tơdroăng pơkâ mê, Kăn xiâm pơkuâ hnê ngăn Đảng, kăn xiâm hnê ngăn tơnêi pơkâ thế mâu khu xiâm, kơvâ cheăng, kơ koan ki tơdjâk troh dêi péa tơnêi têa pơtối mơnhên mâu troăng hơlâ pơkâ, tơdroăng vâ pêi ki kân kal ƀă tơdroăng tơrŭm cheăng tung tŭm tơdroăng pơla péa pâ; teăm kơjo kum, tơleăng mơnhên mâu tơdroăng xơpá, tơvâ tơvân dêi mâu khu ‘no liăn cheăng.

Kăn xiâm pơkuâ hnê ngăn Đảng, kăn xiâm hnê ngăn tơnêi xuân púi vâ Mih kô hnan thế, mơhnhôk khu mơdró Mih mơdêk ‘no liăn cheăng a Việt Nam, hlối pro tơ’lêi hlâu, pơtối veăng kum mâu khu ‘no liăn cheăng dêi Việt Nam po rơdâ tơdroăng ‘no liăn cheăng tê mơdró ai pơxúa.