Kơxo lơ 20/12, a Tíu xiâm po Rôh hôp Tơnêi têa (Hà Nội), Khu pơkuâ ngăn Tíu xiâm Đảng, Kuô̆k hô̆i, Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, Vi ƀan Xiâm Măt trâ̆n Tơnêi têa Việt Nam ƀă Khu pơkuâ ngăn Đảng lêng Tơnêi têa, Khu xiâm pơkuâ ngăn lêng tơkŭm po kân krip leh tơbâ 80 hơnăm Hâi mơjiâng Khu lêng kuăn pơlê Việt Nam, 35 hơnăm hâi mơjiâng tơdroăng cheăng lêng gâk kring tâi tâng kuăn pơlê.

Mơ-éa xua pôa Tô Lâm, Kăn xiâm pơkuâ hnê ngăn Đảng pơchuât a leh tơbâ, tối nhên: hâi lơ 22 khế 12 hơnăm 1944, Đô̆i Việt Nam hnê tối Tơleăng lĕm khu lêng – pơxiâm apoăng dêi Khu lêng kuăn pơlê Việt Nam châ mơjiâng. Xua tơdroăng pơkuâ, hnê hriâm, hriâm pât dêi Đảng pin ƀă kăn xiâm hnê ngăn tơnêi têa hneăng apoăng Hồ Chí Minh, Khu lêng pin hiăng mơnhông rĕng ƀeăn, pơtối mơjiâng mâu tơdroăng cheăng ki rơkê má môi.

Tiô ki xŏn dêi rôh tơplâ, Khu lêng đi đo mơdêk hiâm mơno kăch măng, pêi ki xiâm, rơtế ƀă tâi tâng kuăn pơlê rak vế tơniăn krê, hnoăng pơkuâ, môi tuăn ƀă tâi tâng tơnêi tơníu, rak vế Đảng, rak vế Khu kăn pơkuâ, rak vế Kuăn pơlê ƀă mâu troăng pơkâ xah hô̆i chuh ngiah. Nôkố, tung hneăng kăch măng nếo,  pôa Tô Lâm, Kăn xiâm pơkuâ hnê ngăn Đảng tối nhên túa tơmiât, tơdroăng ki khŏm mơ-eăm vâ Khu lêng kuăn pơlê pơtối pêi klêi rơkê má môi mâu tơdroăng cheăng, rơtế ƀă tâi tâng Đảng, tâi tâng kuăn pơlê, tâi tâng khu lêng pin mơjiâng chiâng mâu tơdroăng tơƀrê nếo tung mơjiâng ƀă rak vế Tơnêi têa xah hô̆i chuh ngiah mê cho rak vế krá ƀă thăm mơdêk tơdroăng pơkuâ khât, tơdrêng mâu kơvâ cheăng dêi Đảng, tơdroăng pơkuâ ngăn dêi Tơnêi têa ƀă Khu lêng kuăn pơlê ƀă tơdroăng cheăng ‘mâi mơnhông cheăng lêng, gâk kring.