Tiô tơbleăng, hơnăm kố, khu râ kăn pơkuâ hnê ngăn cheăng Đảng mâu râ hiăng séa ngăn lối 55 rơpâu khu tơrŭm Đảng ƀă lối 300 rơpâu đảng viên. Klêi kơ’nâi séa ngăn, mơgêi ai lối 1.700 rơpâu khu tơrŭm cheăng Đảng ƀă lối 300 rơpâu đảng viên. Klêi kơ’nâi mơnhên ngăn, tối mơgêi ai lối 1.700 khu tơrŭm ngăn ‘na cheăng Đảng ƀă lối 6 rơpâu đảng viên ai tro piu tro xôi, pro xôi.

Xông tơpui hnê pơtho a hneăng hôp, pôa Tô Lâm, Kăn xiâm pơkuâ hnê ngăn Đảng pơkâ thế tung la ngiâ kal pơtối pêi pro tơdâng tơ’mô mâu troăng hbrâ mơdât pro xôi, tơdroăng ki ôh tá lĕm tro; pơkâ cho ai xôi thế ai tơpui chêh mơgêi, ôh tá ai kơpong ki mơdât, ôh tá ai ki pa kong, thăm mơjiâng Đảng krúa lĕm, krá rơdêi, tơxâng pơkâ hnoăng cheăng tung rơxông nếo.

Kăn xiâm pơkuâ hnê ngăn Đảng pơkâ thế mâu khu râ kăn pơkuâ hnê ngăn Đảng, khu tơrŭm ngăn ‘na cheăng Đảng, Vi ƀan séa ngăn mâu râ thâ rah bro lế lĕm, tro khâp lĕm khu râ kăn pêi cheăng kơ koan Đảng, Tơnêi têa tối tơdjuôm, tung mê ai Vi ƀan séa ngăn tiô tro pơkâ pêi dêi Khu hnê mơhno Tơnêi têa mơgêi pêi pro Pơkâ 18 tơniăn tơdâng tơ’mô, môi tuăn, pro tro khâp lĕm, rơdêi, ai ivá chiâng pêi, xêt khât, châ tơƀrê.