Xông tơpui hnê mơhno a hneăng hôp, mơ’nhê liăn tê kơtê, tơdroăng ki ôh tá lĕm tro mơnhên tung hơnăm 2024 tơdroăng hbrâ mơdât kâ kơhveăm liăn ngân, mơ’nhê liăn tê kơtê, tơdroăng ki ôh tá lĕm tro tung tâi tâng Kơvâ tơdroăng ki xiâm Đảng ƀă dêi mâu Khu hnê mơhno râ kong pơlê, pơlê kong kơdrâm pơtối châ rak tro pơkâ, tro troăng prôk la ngiâ ƀă hiâm mơno ôh tá ai kơpong mơdât, ôh tá ai ki pa kong mơhé mê cho kơbố, gum pro krá tơniăn tơdroăng loi tơngah dêi kuăn pơlê ƀă Đảng, châ pú hmâ mâu kong têa lâp plâi tơnêi kheăn kơdeăn.

Môi tuăn ƀă hnoăng cheăng mê tâi tâng kơvâ pơkâ mơ’no tung hơnăm 2025, Kăn xiâm pơkuâ hnê ngăn Đảng pơkâ thế, rơnêu tơdrêng mau tơdroăng ki u ối tá hâi tro hiăng châ tối nhên tung tơbleăng ƀă mâu tơdroăng tơpui tơno a hneăng hôp. Tối rơdêi hơnăm la ngiâ kô tơkŭm po hên tơdroăng ki kal dêi Tơnêi têa , Đảng ƀă Tơnêi têa pin ai hên troăng hơlâ ƀă troăng tơmiât nếo, pơkâ cho kơtăng ‘nâng.

Xua mê, lâp kơvâ tơdroăng ki xiâm Đảng ƀă mâu Khu hnê mơhno râ kong pơlê, pơlê kong kơdrâm kal pêi tiô kơtăng, ‘nâi nhên vâ tơbleăng châ tơƀrê ƀă Đảng ƀă Tơnêi têa tung tơdroăng cheăng kal kí.