Tung tơdroăng tơkŭm po kân krip, rơrêk tung hiâm mơno, pôa Tô Lâm, Kăn xiâm pơkuâ hnê ngăn Đảng hiăng têk nhang ki xú hŏm lĕm, nhuô̆m koh tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng – Ngế Kăn xiâm hnê ngăn ki nhuô̆m ƀă hâk vâ dêi hdroâng mơngế Việt Nam.

Pôa Tô Lâm, Kăn xiâm pơkuâ hnê ngăn Đảng rơrêk tung hiâm mơno chêh mâu tơdroăng ki tơná tơmiât: ‘’Troh a kố, pin thăm hlê plĕng xua ti lâi Pôa Hồ Chí Minh, Kăn xiâm hnê ngăn tơnêi têa hneăng apoăng ôh tá xê to hâk tơngăm dêi hdroâng mơngế Việt Nam mê ối châ lâp plâi tơnêi nhuô̆m ƀă hâk vâ, kheăn kơdeăn ‘nâng. Troh a kố, pin môi tiah châ vêh a hngêi tơná, achê, nhuô̆m dêi pó, pêng păm tơdroăng tuăn pâ ƀă hlo Pôa xuân ối a kố’’.

Tơpui tơno ƀă mâu kăn ƀô̆, mơngế cheăng a Kơpong tíu chôu ‘măn tơmeăm khoăng ton nah, Kăn xiâm pơkuâ hnê ngăn Đảng tối, châ troh lăm pôu tíu Pôa Hồ ối ƀă pêi cheăng dế ối rêh nah tâ achê, hơtô, tâi tâng tơmeăm Pôa xúa môi tiah hmâ ƀă tơ’lêi hlâu tiah kuăn pơlê, mơhno um méa mơngế Kăn xiâm pơkuâ hnê ngăn ki rơkê.

Kheăn kơdeăn kăn ƀô̆, mơngế cheăng a Hngêi chôu ‘măn tơmeăm khoăng ron nah hiăng pôu râng hnoăng rak vế ƀă mơnhông mâu ki kơnâ tơmeăm nôkố a Hngêi chôu ‘măn tơmeăm khoăng roh nah gum kơdrâm tơmối lâp plâi tơnêi ƀă tung tơnêi têa drêng troh lăm pôu đi đo tâ Pôa Hồ xuân ối a kố ƀă pin.