Tơdah jâ Trần Thị Lâm, hnê cheăng kŏng ti Shangri – La Healthcare Invesment, pôa Tô Lâm, Kăn xiâm pơkuâ hnê ngăn Đảng phiu ro khu tê mơdró mơ’no liăn tung kơvâ khăm pơlât, pơkâ mơdêk rĕng pêi pro mâu tơdroăng tơkêa bro dế pêi pro, pơtối mơ’no liăn cheăng, ki má lối cho mâu kơvâ ki ai kơmăi kơmok rơxông nếo, lĕm ƀă kong prâi.

Kăn xiâm pơkuâ hnê ngăn Đảng tối ăm ‘nâi Việt Nam kô pơtối pro tơ’lêi hlâu ăm khu mơ’no liăn cheăng, tơdrêng amê pơkâ thế mâu kơ koan cheăng, khu râ kăn pơkuâ rơtế ƀă mâu khu mơ’no liăn cheăng vâ mơdêk tơdroăng pêi pro tơdroăng tơkêa bro. Tơdah Lim Boon Heng, Kăn hnê ngăn Grup pơkuâ Temasek, pôa Tô Lâm, Kăn xiâm pơkuâ hnê ngăn Đảng tối rơdêi tơdroăng ki tơmâng tŏng gum dêi Việt Nam tung mơnhông mơdêk cheăng kâ krê, tối ăm ‘nâi Việt Nam xuân hiăng tơbleăng mâu pơkâ mơnhông cheăng kâ, pơkâ thế kŏng ngê̆ nếo, mơngế pêi cheăng rơkê, ƀă mơngế pêi cheăng ing kong têa ê, xua mê mâu kơxô̆ liăn mơ’no cho kal khât.

Tung pơla nôkố, Việt Nam xuân hiăng tơpui tơno mâu pơkâ tê mơdró tơ’lêi hlâu, tơpui tơno ƀă mâu khu tơrŭm cheăng vâ tơleăng mâu tơdroăng ‘na tê mơdró, tơniăn tíu mơ’no liăn cheăng tơ’lêi hlâu ăm mâu khu mơ’no liăn cheăng, tung mê, ai mâu khu mơ’no liăn cheăng Singapore.