Pôa Tô Lâm Kăn xiâm pơkuâ hnê ngăn Đảng pơkâ thế Chin phuh  hnê mơhno thâ pê klêi tâi tâng séa ngăn tơmeăm khoăng tơnêi têa dêi mâu kơ koan, tíu pêi cheăng, kong pơlê tung lâp tơnêi têa ai troăng hơlâ rak ngăn, xing xoăng xúa pro rế lĕm mơngế pêi cheăng ăm tơnêi têa ƀă tíu pêi cheăng rêm râ, tơniăn pêi tơƀrê, ôh tá ăm tro lŭp, mơ’nhiê liăn. Pê klêi tơdroăng pơkâ tung hơnăm 2025 ƀă mâu  tíu pêi cheăng, hngêi ối tơnêi ki ôh tá xúa, ki xúa ôh tá rơhéa.

Ing tơdroăng thế pơ’lêh nhên tâ nếo tung tơdroăng hbrâ mơdât mơ’nhiê, malối tơkŭm pê klêi mâu tơdroăng tơkêa ki hrá pêi, veăng mơhnhôk, xúa ai pơxúa mâu kơxô̆ liăn xiâm vâ pêi mâu tơdroăng pơkâ mơnhông cheăng kâ ing 8% tung hơnăm 2025 ƀă péa kơxô̆ tung mâu hơnăm pơtối. Pôa Tô Lâm xuân pơkâ, pêi tâi tâng tơdroăng hbrâ mơdât kâ kơluâ, mơdât mơ’nhiê liăn, pro ôh tá tro dêi hneăng hôp 13.

Ki ahdrối, tung hơnăm 2025 thế pơhlêh tŭm mâu troăng hơlâ, luât pơkâ dêi Đảng ‘na hbrâ mơdât kâ kơluâ, mơ’nhiê liăn, pro ôh tro hiăng tơpui hên a hneăng hôp má 13.