Péa Kăn xiâm tối phiu ro ‘na tơdroăng mơnhông ó rơdêi, rế hía rế prôk trâu hơngế, kal khât ƀă châ tơƀrê, tá tung tơdroăng tơrŭm pơla péa pâ ƀă hên pâ pơla Kuô̆k hô̆i Việt Nam ƀă Hô̆i đong Tơpui tơno kal kí, cheăng kâ Kuăn pơlê Indonesia; mơnhên tơrŭm cheăng pơla péa tơnêi têa; pói vâ Kơ koan mơjiâng luât dêi péa pâ pơtối ai mâu tơdroăng veăng kum hên ăm tơdroăng mơnhông tơrŭm cheăng nhŏng o, tơrŭm hên pâ ƀă khu tơrŭm cheăng ton xŏn tâi tâng Việt Nam – Indonesia, ing tơdroăng mơjiâng ƀă tơbleăng mâu mơ-éa luât, mơjiâng troăng pơkâ pêi, troăng hơlâ tơtro, tơ’lêi hlâu vâ pêi pro tơrŭm cheăng tung mâu kơvâ cheăng, ki má lối cho cheăng kâ, tê mơdró ƀă mơ’no liăn cheăng pơla péa tơnêi têa.

Kăn xiâm hnê ngăn – pôa Ahmad Muzani mơnhên Indonesia đi đo nhuô̆m tơrŭm cheăng ƀă Việt Nam, xua pơxúa dêi kuăn pơlê péa tơnêi têa, xua hơniâp lĕm, tơniăn, tơrŭm cheăng, mơnhông tung kơpong ƀă lâp plâi tơnêi.