Leh tơbâ 80 hơnăm hâi mơjiâng Khu lêng kuăn pơlê Việt Nam, 35 hơnăm Hâi xah hêi ro Gâk kring tơnêi têa tâi tâng kuăn pơlê, kơxê lơ 18/12, a Hngêi hôp Khu xiâm pơkuâ lêng, pôa Tô Lâm, Kăn xiâm pơkuâ hnê ngăn Đảng, Kăn pơkuâ hnê ngăn cheăng Đảng kơvâ lêng Tơnêi têa troh veăng ƀă pơkuâ roh trâm mâ, mơhnhôk rơxông ối nếo tung khu lêng.

Tơpui ƀă mâu kăn teăng mâ droh rơtăm tung khu lêng ki rơkê, pôa Tô Lâm, Kăn xiâm pơkuâ hnê ngăn Đảng mơnhên, tung plâ tơdroăng mơnhông tơtêk 80 hơnăm hiăng hluâ, mâu rơxông ối nếo droh rơtăm khu lêng đi đo djâ tâi ivá, tá hiâm mơno, tuăn ngôa rơkê, ƀă hiâm mơno khên tơnôu ƀă hiâm mơno khŏm mơ-eăm, tâi hiâm mơno pêi cheăng ăm Tơnêi têa, gum ăm kuăn pơlê, hbrâ tơplâ, ôh tá ton tơrôu hmâ vâ ai tơdroăng rơ-iô, hbrâ tơplâ, a tíu lâi xuân pêi cheăng, pêi tâi tâng hnoăng cheăng ki Tơnêi têa ƀă Kuăn pơlê kal troh.

Tối nhên, tơnêi têa dế ai roh tơ’lêi hlâu mot tung rơxông nếo, rơxông mơnhông mơdêk, kro mơdrŏng rơdêi; Kăn xiâm pơkuâ hnê ngăn Đảng tối, mâu tơdroăng pói vâ mê, tơdroăng hâk vâ mê cho kơnôm kân tung khu droh rơtăm, tung mê, droh rơtăm Khu lêng ai hnoăng kal khât, cho ki xiâm, prôk hdrối.

Đảng, Tơnêi têa ƀă Kuăn pơlê dế pói tơngah, pói vâ kân tung tơdroăng mơnhông, tơdroăng mơ-eăm tơtêk, “tơkâ hluâ dêi tơná” dêi droh rơtăm Khu lêng.