Kơxo lơ 18/12, a Hà Nội po rôh hôp kân krip Hneăng hôp khu kăn lâp tơnêi têa Khu tơrŭm Droh rơtăm Việt Nam rôh má 9, hơnăm 2024 – 2029. Pôa Tô Lâm, Kăn xiâm pơkuâ hnê ngăn Đảng veăng hôp ƀă tơpui hnê mơhno a rôh hôp. Ƀă tơdroăng “Droh rơtăm Việt Nam, pâ tơnêi têa – rơhêng vâ – tơrŭm – pêi hdrối – rơkê, khên tơnôu mot tung chal nếo”, hneăng hôp ai hnoăng cheăng mơnhên tối klêi kơ’nâi tơdroăng cheăng Hô̆i ƀă tơdroăng droh rơtăm pơla hơnăm 2019 – 2024, mơjiâng tơdroăng pơkâ, mơnhên tơdroăng cheăng, troăng hơlâ pêi cheăng dêi Hô̆i ƀă tơdroăng cheăng pêi dêi Droh rơtăm pơla hơnăm 2024 – 2029.

Tơpui hnê mơhno a Hneăng hôp, pôa Tô Lâm, Kăn xiâm pơkuâ hnê ngăn Đảng tối nhên, tung mâu hneăng kăch măng, Đảng pin tơmâng ngăn khât troh tơdroăng cheăng droh rơtăm ƀă ki kal dêi tơdroăng cheăng droh rơtăm tung hneăng kăch măng nếo dêi Đảng, dêi hdroâng mơngế.

Kăn xiâm pơkuâ hnê ngăn Đảng pơkâ thế pơhlêh nếo rơdêi hnoăng cheăng Hô̆i, Đoân; mơjiâng khu kăn ƀô̆ Hô̆i, Đoân krá rơdêi; mơnhên nhên hnoăng cheăng dêi Hô̆i, mâu khu tơrŭm cheăng pú hên dêi Hô̆i, Đoân Droh rơtăm Kŏng san Hồ Chí Minh tung hnoăng cheăng hnê hriâm tuăn tơmiât kăch măng, hbrâ mơdât tơdroăng ki pro kơdroh tuăn tơmiât tro, túa rêh ối tung droh rơtăm, hok tro, sinh viên.