Tơbleăng hnê pơtho a rôh hôp, pôa Tô Lâm - Kăn xiâm pơkuâ hnê ngăn Đảng tối nhên, nôkố lâp tơnêi têa dế pơhlêh tơná, tuăn vâ dêi Đảng tơrŭm ƀă kuăn pơlê tung tơdroăng púi vâ pơxiâm mot tung rơxông nếo, rơxông mơnhông tơná dêi hdroâng mơngế, mơ-eăm pêi klêi 2 pơkâ 10 hơnăm (100 hơnăm tơnêi têa ing tơdroăng pơkuâ hnê djâ dêi Đảng ƀă 100 hơnăm mơjiâng tơnêi têa).

Malối, hơnăm 2025 cho hơnăm ai pơxúa kal khât ƀă cho xiâm ăm rơxông ki nếo, ƀă 3 tơdroăng cheăng ki kân thế pê klêi, mê cho: Mơgêi Pơkâ kơxô̆ 18 ƀă pơhlêh nếo, xing xoăng tơkŭm khu kăn cheăng kal kí. Tâk rĕng vâ pêi pro mâu pơkâ, tơdroăng cheăng dêi hneăng hôp má 13 ƀă Tơkŭm po hneăng hôp Đảng ƀô̆ rêm râ ƀă hbrâ tro mâu tơdroăng vâ tơkŭm pê klêi Hneăng hôp má 14 dêi Đảng.  

Xua mê, tơrêm ngế kăn ƀô̆ tung Ƀơrô xiâm Đảng thế tơchĕng tơmiât ‘na hnoăng cheăng dêi tơná vâ ‘no hnoăng a tơdroăng cheăng ki kân dêi tơnêi têa.