Tung pơla lăm pôu pêi cheăng, veăng ai mâ a roh Hôp pơla khu kăn xiâm ngăn ‘na tơdroăng cheăng, khu tơpui nâl Pơhlăng roh má 19 ƀă lăm pôu pêi cheăng păng ‘nâng a kong têa Pơhlăng ing hâi lơ 3 troh lơ 7 khế 10 hơnăm 2024, peăng kơxo hâi lơ 4/10, tiô chôu kong têa kố, a Paris, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng tơdah Kăn xiâm ngăn ‘na tơdroăng cheăng kong têa Pơhlăng, Kăn xiâm hnê ngăn tơrŭm rah xo mơngế ki rơkê tơpui nâl Pơhlăng, Kăn xiâm hnê ngăn ki mơjiâng pro hnoăng cheăng Notus Technologies.

A mâu chôu trâm mâ, tơpui tơno, pôa Tô Lâm pâ thế, Khu ngăn ‘na hnoăng cheăng Pơhlăng pơtối tŏng gum, ƀă cho khu ki vâ tơrŭm tơdjêp tung mơ’no liăn cheăng kâ tê mơdró pơla khu pêi cheăng dêi péa pâ tơnêi têa tung la ngiâ ah; Vêh mơnhên Việt Nam ai troăng hơlâ ki pro mơngun, tơ’mot, tơrŭm tung tơdroăng ki rah xo hnoăng cheăng ki dâi păng ‘nâng, châ tơƀrê, kŏng ngê̆ ƀă rak krúa lĕm tơnêi tíu, hyôh kong prâi, ing mê, cho ki xiâm vâ vêh mơnhên ngăn hnoăng cheăng ki tơƀrê.

Pôa Tô Lâm vêh mơnhên, Việt Nam tơkêa kô rơtế prôk ƀă tŏng gum tơ’lêi hlâu vâ mâu khu mơdró kâ dêi kong têa Pơhlăng tối krê ƀă mâu kong têa ê tối tơdjuôm pêi pro hnoăng cheăng ki mơ’no liăn cheăng tê mơdró kâ châ tơƀrê ƀă châ dâi khât a Việt Nam.