Kơxê hâi lơ 7/8, a Hà Nội, pôa Trần Lưu Quang, Ngế pro xiâm phŏ hnê ngăn tơnêi têa - Kăn xiâm hnê ngăn Vi ƀan Tơnêi têa hbrâ ví xiá vâ kong prâi pro ôh tá tơniăn ƀă tŏng xo mơngế hliăng tiâ pơkuâ hôp tơbleăng pêi tơdroăng kal tung mâu khế mơ’nui hơnăm 2023. Luâ vâ chê 8 khế, lâp tơnêi têa tối ai 1 rơpâu 753 tơdroăng xía vâ, kong prâi pro ôh tá tơniăn pro hlâ ƀă tro rong 450 ngế; 1 rơpâu 176 ha kong tro chếo; loăng kơtong, lối 9 rơpâu toăng hngêi tơtêa kuâ, lup 45 rơpâu ha báu prá alâi... Hbrâ ví xơpá tơkâ luâ tơdroăng xía vâ, hiăng mơhnhôk tŏng kum lối 53 rơpâu ngế ƀă 3 rơpâu 633 hdrôh plong tuk tŭm túa.

Tối a rôh hôp ăm hlo, mơhé tơdroăng hnê tối châ tơmâng khât, la ai mâu khu kan ki ‘nâ, mâu tíu pêi cheăng, cheăm tơring kong pơlê ƀă kuăn pơlê tơngôu, ôh tá vâ rĕng tơmâng, tơmeăm lŭp xua kong prâi pro hên hĭn, malối hlâ mơngế ƀă tro lŭp tơmeăm dêi kuăn pơlê, kong mêi têa rơlêa, tơnêi tơhnâp...

Tối mơgêi a rôh hôp, pôa Trần Lưu Quang môi tuăn ƀă 12 tơdroăng cheăng ki kal hiăng pơkâ. Ngế pro xiâm phŏ hnê ngăn tơnêi têa tối nhên, kong prâi pro ôh tá tơniăn sap nôkố troh mơ’nui hơnăm pá vâ ‘nâi hdrối, hbrâ ví kong prâi oh tá tơniăn thế hbrâ rơnáu, mâu khu xiâm kơvâ cheăng cheăm tơring kong pơlê thế séa ngăn nếo mâu tơdroăng pêi pro dêi tơná vâ tơ’nôm ăm tơtro ƀă tơdroăng púi vâ tung hbrâ ví kong prâi pro ôh tá tơniăn.