Kơdrâm kuăn pơlê cheăm Tịnh Khê, pơlê kong kơdrâm Quảng Ngãi tối hên tơdroăng tô tuăn ‘na tơdroăng hdi xo tơnêi, mơjiâng pro tơmeăm ôh tá tro luât, pro xôi tíu kơdrâm kuăn pơlê rêh ối tê mơdró; môi troăng pơkâ pêi, troăng hơlâ ối pá hiăng tơdjâk troh tơdroăng tơleăng gum liăn tung mâu tơdroăng pơkâ, troăng hơlâ ăm kuăn pơlê.

Pôa Trần Quang Phương, Kăn xiâm phŏ hnê ngăn Kuô̆k hô̆i hiăng mơnhên mâu tơdroăng pâ thế dêi kuăn pơlê ƀă pơkâ khu râ kăn pơkuâ kong pơlê Quảng Ngãi ƀă mâu kơ koan rơkê tơkŭm tơleăng ƀă tiâ rơkong kuăn pơlê kơ-êng. Ƀă mâu pâ thế râ tơnêi têa, Khu râ kăn teăng mâ Kuô̆k hô̆i mơnhên ƀă kô ai rơkong veăng tơpui tối troh mâu khu xiâm, kơvâ Tơnêi têa.

Tơdjâk troh mâu pá puât xua Luât tơnêi tơníu nếo hiăng pêi tung tơdroăng nôkố, pôa Trần Quang Phương tối nhên: “12 rơtuh rơkong tơpui tối dêi kuăn pơlê veăng tơpui tối ‘na Luât tơnêi tơníu kố drêng hbrâ tơbleăng ăm pêi pro, tơmâng xo rơkong kuăn pơlê tơpui cho kal khât, nôkố tah lôi to lâi mê thế tơkôm Luât pêi pro tung tơdroăng rêh ối môi pơla ‘nôi mê nếo chiâng tiâ.