A chôu phut peăng kơxo, khu kăn hiăng lăm pôu, rơkâu Têt ƀă hbruô tơmeăm ăm kăn ƀô̆, mâu lêng, Đông gak tíu tơkăng kong Tuy Đức (ối tung Khu pơkuâ ngăn lêng Gak tíu tơkăng kong dêi kong pơlê Dak Nông); Đăi đô̆i Bô̆ binh 3 (ối tung Khu pơkuâ ngăn lêng tơring Tuy Đức). Drêng kố, Khu kăn dêi Tơnêi têa hiăng diâp 50 hnoăng tơmeăm troh a mâu rơpŏng ki ai tơdroăng rêh ối xahpá ƀă 20 kơxu tơmeăm ăm hok tro cho kuăn roăng dêi đông lêng gak tíu tơkăng kong.

Peăng xêi ki mê, pôa Trần Quang Phương rơtế ƀă khu kăn dêi Tơnêi têa hiăng lăm pôu, rơkâu Têt kăn ƀô̆, mâu lêng, ƀă kuăn pơlê a cheăm kơpong ki xahpá môi môi dêi kong pơlê, cho cheăm Dak Ngo, tơring Tuy Đức, kong pơlê Dak Nông. Pôa Trần Quang Phương hiăng hâk kơdeăn tơdroăng ki khu kăn pơkuâ ngăn tơring hiăng kơdo mơ-eăm pêi pro tro tơdroăng tŏng gum tơmeăm Têt ăm kuăn pơlê. Klêi mê, pôa ối lăm pôu, rơkâu Têt kơ mâu krâ pơlê, mơngế ki châ kuăn pơlê loi tơngah, pôa Trần Quang Phương xuân ai pơchân tối, hnoăng cheăng dêi krâ pơlê, dêi mơngế ki châ kuăn pơlê loi tơngah, cho khu ki xiâm, veăng gum mơhno tơdjâ troăng tơdjâ, troăng pơkâ ƀă Luât dêi Đảng, Tơnêi têa troh a kuăn pơlê, tơdrêng amê, hnối veăng pêi pro kơhnâ khât tung tơdroăng ki mơjiâng hnoăng tơrŭm pơla khu hdroâng mơngế.