Kố cho rôh hôp má mơ'nui hbrâ ăm Hneăng hôp má Péa, Kuô̆k hô̆i hneăng má XVI, tiô tối hdrối tơbleăng 38 luât ƀă hên tơdroăng pơkâ ki kal, tung mê ai dâng 7 tơdroăng pơkâ luât. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế mâu kơ koan chêh pro hlá mơ-éa, séa ngăn pơtối hơ'lêh nếo tuăn tơmiât, túa pêi cheăng, mơdêk ki rơkê plĕng mâu tơdroăng pơtroh ăm Kuô̆k hô̆i; tơkŭm pêi nhên mâu tơdroăng ki xiâm, mơdêk ki dâi lĕm, tơƀrê ƀă pơkâ mơnhông mơdêk a hdrối.

Tung mê, tơdroăng tơkêa bro Luât tơnêi tơníu ('mâi hơ'lêh) ƀă Luât tơbleăng hlá mơ-éa pơkâ luât ai pơxúa xiâm. Kăn xiâm hnê ngăn Kuô̆k hô̆i tối nhên, Luât tơnêi tơníu tơdjâk troh tâi tâng tơdroăng cheăng kâ ƀă tơdroăng rêh ối kuăn pơlê, châ hên ngế kuăn pơlê, khu mơdró kâ tơmâng, xua mê thế pêi kơtăng, pêi nhên. Vi ƀan pơkuâ Kuô̆k hô̆i xuân ăm rơkong tơpui tối 'na tơdroăng tơkêa bro Luât tơnêi tơníu ('mâi hơ'lêh), tung mê tơmâng troh troăng hơlâ châ achê, xúa tơnêi ƀă pơkâ yă tơnêi tiô troăng tơbleăng, tơdrăng, tơdâng tơ'mô, tơtro pơla Tơnêi têa, mơngế xúa tơnêi ƀă khu mơ'no liăn cheăng.