Hiăng lối 30 hơnăm mơjiâng tơrŭm cheăng tơpui kâ, malối cho tơdroăng ki mơdêk tâk troh kong têa tơrŭm cheăng tung la ngiâ tŭm têk a hơnăm 2022, tơrŭm pơla Việt Nam-Hàn Quốc dế ối a hneăng ki mơnhông tơniăn lĕm má môi ing hdrối nah troh nôkố. Tiô pôa Trần Thành Mẫn, Kăn xiâm hnê ngăn Kuô̆k hô̆i tối, mê cho tơdroăng ki vâ mâu khu mơdró kâ péa tơnêi têa hmiân tuăn tơrŭm ton xŏn, tíu pêi cheăng kân tâ ƀă tơƀrê tâ.

Hên hơnăm hdrối, Hàn Quốc đi đo rak tíu pêi cheăng ối má môi ‘na ‘no liăn cheăng tơdrêng a Việt Nam, kơxô̆ riân troh tâi khế 11 hơnăm kố châ vâ chê 90 rơtal dollars. Pôa Trần Thanh Mẫn, Kăn xiâm hnê ngăn Kuô̆k hô̆i rơhêng vâ tung la ngiâ ah, Grup pơkuâ Samsung gum Việt Nam mơdêk ivá tơbriât khu mơdró kâ tung tơnêi têa vâ châ veăng tung khu tơrŭm dêi Grup; púi vâ Grup chiâng ngế ki ‘no liăn tung la ngiâ, veăng gum kân ăm cheăng kâ tê mơdró Việt Nam, mơnhông kơmăi kơmok ki xúa.