Mâu kuăn pơlê pâ thế troh pôa Trần Thanh Mẫn, Kăn xiâm hnê ngăn Kuô̆k hô̆i ƀă Khu kăn Kuô̆k hô̆i kong pơlê Hậu Giang hên tơdroăng ki tơdjâk troh troăng hơlâ tŏng gum baoh hiâm khăm pơlât, Baoh hiâm xah hô̆i; troăng hơlâ tŏng gum tơnêi, chêl thiê̆n tíu ki pro pơlê; hlá mơéa hriâm, troăng hơlâ tŏng gum ăm mâu cô yăo mầm non; hnoăng cheăng hbrâ mơdât kâ kơluâ liăn ngân dêi Đảng ƀă hên ki ê.

Tơpui ƀă kuăn pơlê, pôa Trần Thanh Mẫn, Kăn xiâm hnê ngăn Kuô̆k hô̆i hiăng tối ‘na tơdroăng mơnhông cheăng kâ rêh ối pơlê pơla dêi tơnêi têa pin, dêi kong têa ê. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, hlo tơdroăng mê, Kuô̆k hô̆i hiăng ƀă dế pơhlêh nếo túa tơmiât pêi, túa mơjiâng troăng hơlâ luât tiô troăng châ hlo mâu tơdroăng ôh tá tơniăn, xơpá vâ ‘mâi rơnêu Luât, Pơkâ. Xua mê, tơdroăng ki mơjiâng luât athế lo ing tơdroăng ki ai khât, rế pêi rế ngăn mâu tơdroăng ki hdrối nah pêi tá hâi tro, xo kuăn pơlê ƀă khu mơdró kâ pro ngế ki xiâm, teăm tŏng gum mâu tơdroăng xơpá.