Kơxê lơ 21/8, a Hngêi Kuô̆k hô̆i, pôa Trần Thanh Mẫn, Kăn cheăng tung Khu xiâm kal kí, Kăn xiâm phŏ hnê mơhno má môi Kuô̆k hô̆i – Kăn pơkuâ tơkŭm po Hneăng hôp Kuô̆k hô̆i râ má môi hơnăm ối nếo lâp plâi tơnêi roh má 9, hiăng pơkuâ roh hôp ƀă Khu tơkŭm po, mâu Tiêuh ƀan ối tung Khu tơkŭm po ƀă Khu rah chêh tôm xo rơkong Tơnêi têa vâ séa ngăn tơdroăng hbrâ tơkŭm po Hneăng hôp.

Pôa Trần Thanh Mẫn tối nhên, Hneăng hôp Kăn Kuô̆k hô̆i râ má môi hơnăm ối nếo lâp plâi tơnêi roh má 9 dêi Khu tơrŭm Kuô̆k hô̆i râ má môi lâp plâi tơnêi (IPU) xua Kuô̆k hô̆i Việt Nam tơkŭm po cho tơdroăng ki kal tơpui kâ ƀă kong têa ê ai râ ki kal dêi Đảng, Tơnêi têa pin tung hơnăm kố. Kố cho hnoăng cheăng kal kí ki kân, pơkâ thế mâu kơvâ cheăng, mâu râ, tíu cheăng thế pêi pro lĕm tro tơdroăng hbrâ, pêi ăm hneăng hôp, lôi ăm tơdroăng ki lĕm ƀă mâu kăn teăng mâ veăng Hneăng hôp ‘na um méa tơnêi têa, kuăn mơngế Việt Nam; tơdroăng pêi cheăng mâu ngế tơdah tơmối – mâu ngế pêi tơdroăng tŏng kum pa rŏng kal thế rak tơniăn hbrâ nhên.

Bu u ối lối 20 hâi nếo kô tơkŭm po Hneăng hôp, tung pơla hbrâ ôh tá ối hên xếo, tối rơdêi tơdroăng kố, pôa Trần Thanh Mẫn pơchân tối mâu kơ koan, tíu cheăng ƀă rêm khu ki tơdjâk mơnhông hiâm mơno pôu râng hnoăng cheăng kân, thăm pêi pro hnoăng cheăng châ pơcháu.