VOV4.Xơ Đăng - Kơxo lơ 5/7, a Hngêi Kuô̆k hô̆i, pôa Trần Thanh Mẫn, kăn xiâm phŏ hnê ngăn Kuô̆k hô̆i hiăng tơdah khu kăn ki pêi dêi hnoăng cheăng kong pơlê Indonesia (Kuô̆k hô̆i râ má môi) xua jâ Sylviana Murin, kăn pơkuâ Vi ƀan tơrŭm cheăng Kuô̆k hô̆i pêi pro ngế pro xiâm pơkuâ djâ khu kăn kố dế ai rôh lăm pôu ƀă pêi cheăng a Việt Nam. Pôa Trần Thanh Mẫn mơnhên tối khât rôh lăm pôu, pêi cheăng kố dêi Sylviana Murin ƀă khu kăn ki pêi dêi hnoăng cheăng, tối nhên Việt Nam đi đo ngăn nhuô̆m ƀă rơhêng vâ mơnhông tâ nếo tơrŭm tơroâ khôi hmâ ƀă kong têa tơrŭm cheăng tung la ngiâ ƀă Indonesia.

Hơnăm 2023 cho hơnăm ki mơnhên tối hiăng châ 10 hơnăm péa tơnêi têa mơjiâng tơrŭm cheăng la ngiâ. Xua mê tung la ngiâ ah, péa pâ kal tơrŭm krá tơniăn ta nếo vâ ăm tơrŭm cheăng tung la ngiâ tâk troh a hneăng ki nếo, malối cho tơdroăng tơrŭm cheăng Kuô̆k hô̆i va tơxâng ƀă tơrŭm cheăng tung la ngiâ péa tơnêi têa.

Katarina Nga tơplôu ƀă tơbleăng