Kơxo hâi lơ 8/8, a Hngêi Kuô̆k hô̆i, Khu kăn séa ngăn “Tơdroăng pêi pro tiô luât ‘na rak ngăn tơdroăng tê mơdró tơnêi tơníu hngêi trăng ƀă  pro hên  hngêi ối hơnăm ăm kuăn pơlê hơnăm 2015 troh tâi hơnăm 2023” hôp Rôh má môi. Khu kăn séa ngăn tơdroăng kố xua pôa Trần Thanh Mẫn, Kăn xiâm phŏ hnê ngăn Kuô̆k hô̆i pro xiâm pơkuâ khu kăn, tơdrêng ƀă 3 ngế phŏ  pơkuâ khu kăn; 22 ngế ƀă3 mâu kăn, mâu ngế ki rơkê krếo.

Xiâm tơdroăng séa ngăn tối mâu tơdroăng hiăng châ pêi pro, ki xơpá, tơvâ tơvân, ngăn pro ƀai hriâm, tăng troăng rơhlâ pêi tơƀrê luât pơkâ, luât ‘na rak ngăn tơdroăng tê mơdró tơnêi tơníu ƀă hngêi ối pơlê pơla. Ƀă tơdroăng pro hên hngêi ối ăm pơlê pơla, séa ngăn tơkŭm a tơdroăng, pơkâ, mâu tơdroăng pro hên hngêi ối ăm pơlê pơl; mâu ngế, tơdroăng ki xúa luât pơkâ ‘na mơnhông pro hngêi ối pơlê pơla; mâu ngế, tơdroăng xúa luât pơkâ ‘na hngêi ối pơlê pơla...

Tơbleăng  a rôh hôp, pôa Trần Thanh Mẫn, Ngế pro xiâm phŏ hnê ngăn Kuô̆k hô̆i tối nhên kố cho tơdroăng séa ngăn ki kân dêi Kuô̆k hô̆i, vâ mâu ngế tung khu mơ-eăm tí tăng ngăn tơpui tơno, veăng hnê tối ‘na Pơkâ séa ngăn, tơbleăng tơdroăng séa ngăn ƀă Pơkâ ‘na tơdroăng séa ngăn tơdroăng châ tơƀrê má môi.