VOV4.Xơ Đăng - Kơxo lơ 29/5, a tơring Bá Thước, kong pơlê Thanh Hóa, po leh lo lăm pêi cheăng Droh rơtăm pleăng dêi hnoăng cheăng a rơnó pơtê hriâm 2022 xua Tíu xiâm Đoân Droh rơtăm Kŏng san Hồ Chí Minh tơkŭm po. Tơdroăng Droh rơtăm pleăng dêi hnoăng cheăng a rơnó pơtê cheăng hơnăm 2022 tơbleăng hên tơdroăng pêi pro ai pơxúa a 74 tơring kơtiê ối tung 26 kong pơlê, 54 to cheăm malối xơpá kơpong tíu, kĭng têa kơxĭ ƀă chuăn ối tung 12 kong pơlê ƀă 33 to Pơlê droh rơtăm pơxiâm vâ pêi cheăng xua Tíu xiâm Đoân Droh rơtăm ‘no liăn mơjiâng hneăng hơnăm 2001 – 2020.

Tơdroăng pleăng dêi hnoăng cheăng a rơnó pơtê hriâm hơnăm kố po sap ing hâi lơ 1/6 troh lơ 31/8 ƀă túa pơkâ hrá rơdâ lâp lu – tơniăn – tơƀrê – krá tơniăn tơtro ƀă hnoăng cheăng kal kí, tơdroăng ki rơhêng vâ tung ki ai khât dêi rêm kong pơlê, tơring, cheăm, tíu pêi cheăng.

Tơpui a Leh lo lăm pêi cheăng, Pôa Trân Thanh Mẫn, kăn phŏ hnê ngăn Kuô̆k hô̆i pơkâ thế: tơrŭm cheăng Đoân kal pơtối mơnhên tơdroăng ki Droh rơtăm pleăng dêi hnoăng cheăng a rơnó pơtê hriâm cho môi roh pêi pro tơdroăng kal kí ki kal, tơbleăng ing tơdroăng vâ hnê hriâm hiâm mơno kăch măng, hbrâ rơnáu pleăng hnoăng, mâu tơdroăng ki ai pơxúa ki kŭn dêi mâu ngế krê xua ki pơxúa khu pú hên, pơlê pơla, xua tơdroăng kro mơdrŏng dêi tơnêi têa.

Katarina Nga tơplôu ƀă tơbleăng