Kơxo lơ 6/1, Đảng ủy khu mơdró xiâm tơnêi têa tơkŭm po Hôp mơgêi tơdroăng cheăng pêi hơnăm 2022, tơbleăng pêi  tơdroăng cheăng kal tung hơnăm 2023. Ƀă tơdroăng tơrŭm môi tuăn, hriăn plĕng ki nếo, pơ’lêh nếo, Đảng ủy Khu mơdró xiâm Tơnêi têa hiăng tơdjuôm ivá, môi tuăn, mơ-eăm tơkâ luâ xơpá; tơkŭm tơbleăng hên troăng rơhlâ pêi kơtăng, pêi tro tơdroăng mơjiâng Đảng bă mâu kăn pơtối hnê mơhno, ‘mâi mơnhông mơdêk pêi cheăng kâ mơjiâng pro tơmeăm tê mơdró dêi mâu khu mơdró. 

Tối tơbleăng hnê mơhno a rôh hôp, pôa Trần Tuấn Anh, Ngế kăn tung Khu cheăng kâ xiâm tơnêi têa tối nhên, tung la ngiâ Đảng ủy Khu ƀă rêm râ Đảng, kăn hnê mơhno rak ngăn khu mơdró, hngêi rak liăn tung khu  mơdró Xiâm tơnêi têa kal pơtối pơkuâ, hnê mơhno pêi tro tơdroăng cheăng mơjiâng Đảng, mơdêk ivá pơkuâ hnê tâi tâng ƀă ivá tơplâ dêi tâi tâng Đảng ƀô̆. Pơ’lêh nếo tơdroăng kal, tơdroăng pêi, troăng rơhlâ, mơdêk ki tơƀrê dêi tơdroăng cheăng kal kí, tuăn ngôa.