Peăng xê hâi lơ 20/10, pôa Võ Văn Thưởng, Kăn xiâm hnê ngăn tơnêi têa ƀă Khu xiâm pơkuâ ngăn tơnêi têa Việt Nam hiăng prếo vêh troh a Hà Nội, mơgêi hneăng veăng hôp Khu kăn xiâm tơrŭm cheăng “Troăng ví tâ tá-Troăng prôk kân xiâm” do inâi BRF roh má 3 po a kong têa Sinuâ.

A pơlê kong xiâm Bắc Kinh, kong têa Sinuâ, tung roh tơpui tơno to khu râ kăn xiâm “Troăng ví tâ tá ƀă Troăng prôk kân xiâm”, pôa  Võ Văn Thưởng, hiăng veăng Leh pơxiâm po hneăng hôp, ai 4 rơpâu ngế kăn lo ing 140 to kong têa ƀă 30 khu pơkuâ cheăng lâp plâi tơnêi ƀă lối  20 ngế kăn xiâm dêi mâu kong têa, mơngế xiâm dêi Chin phuh hiăng veăng troh tơkŭm a hneăng hop kố.

A roh hôp kố, pôa Võ Văn Thưởng hiăng tối nhên ki xiâm dêi hnoăng cheăng tơnêi têa Việt Nam, đi đo vâ môi tuăn ăm tơdroăng ki pơkâ tung roh hôp, mê cho đi đo vâ ai tơdroăng hơniâp lĕm, tơrŭm tơrôa tung kơpong ƀă tung lâp plâi tơnêi; tung mê, ai hnoăng cheăng ki rơkê nếo cho “Troăng ví tâ tá ƀă Troăng prôk kân xiâm” xua peăng kong têa Sinuâ djâ troăng ahdrối.

Drêng troh veăng a roh hôp kố, pôa Võ Văn Thưởng hiăng ai hên roh trâm mâ, tơpui tơno; trâm mâu kăn xiâm dêi hên mâu kong têa, mâu kăn xiâm dêi kơpong, mâu khu kăn xiâm lâp plâi tơnêi, tơpui tơno ‘na mâu tơdroăng thăm mơdêk tơrŭm cheăng ƀă peá pâ tơnêi têa. Hneăng lăm hôp kố hiăng châ mơgêi tơniăn lĕm tro, mơhno tối ki tơkêa ki ó rơdêi luâ tâ kơmê nếo dêi Việt Nam ƀă mâu kong têa tung lâp plâi tơnêi, thăm mơdêk ƀă tơrŭm tơtêk rế ó tâ ‘na cheăng kâ tung kơpong ƀă tung lâp plâi tơnêi.