Pôa Võ Văn Thưởng ai mơnhên tối, Kăn teăng mâ kong têa Nigeria hiăng veăng ‘no hnoăng cheăng ki kal tung thăm mơdêk tơrŭm cheăng pơla Việt Nam ƀă Nigeria, rơkâu kong têa Nigeria hiăng châ mơnhông, pêi pro hên tơdroăng cheăng kâ-rêh ối pơlê pơla ki kal tung pơla mâu khế hơnăm hdrối mê hía nah.

‘Na tơrŭm pơla péa pâ tơnêi têa, pôa Võ Văn Thưởng mơnhên tối tro ‘ló khât ki hiăng châ chiâng pêi pro tung tơrŭm pơla Nigeria ƀă Việt Nam tung pơla mâu khế hơnăm hdrối mê hía nah, ki rơhêng vâ tối, hnoăng cheăng veăng mơnhông mơdêk ‘na pêi cheăng kâ - rêh ối pơlê pơla. Vêh mơnhên Việt Nam rak vế, pêi pro tro tiô troăng hơlâ hiăng tơkêa cho rak vế tơniăn krê dêi tơnêi têa, tơná pơkuâ ngăn dêi tơdroăng rêh ối tơnêi têa xua vâ pro hơniâp lĕm, tơrŭm nhŏng o, tơrŭm cheăng ƀă mơnhông, tơrŭm ƀă hên mâu kong têa pú hmâ ki ê, pêi pro hên túa cheăng ki tơrŭm tơpui kâ, pêi pro; cho pú hmâ, cho ngế ki loi tơngah ƀă cho kong têa pú hmâ ki ai pơxúa kal kân khât, pôu râng hnoăng cheăng dêi mâu kong têa tung lâp plâi tơnêi.

Pôa Võ Văn Thưởng ai tối ăm ‘nâi, Việt Nam pói rơhêng vâ mơnhông luâ tâ kơ mê nếo tung tơrŭm cheăng ƀă kong têa Nigeria tung hên kơvâ cheăng. Péa pâ kal athế pơtối mơdêk tơdroăng cheăng, tơrŭm pơla khu kăn xiâm, khu kăn pơkuâ; thăm mơdêk luâ tâ kơ mê nếo pơla mâu khu râ pơkuâ ngăn tơdroăng cheăng, kơvâ cheăng, mâu kong pơlê, pơlê kong kân; pơtối mơdêk tơdroăng ki tơpui tơno pơla mâu kong têa tung kơpong ƀă tung lâp plâi tơnêi.