Tơdah Kăn teăng mâ Venezuela pôa Juan Carlos Fernandes Juarez, pôa Võ Văn Thưởng rơkâu kăn teăng mâ xo pêi hnoăng cheăng a Việt Nam; loi khât, tung hneăng pêi cheăng dêi Kăn teăng mâ, tơdroăng tơrŭm cheăng pơla Việt Nam- Venezuela kô pêi tơƀrê hên tơdroăng ki nếo. Kăn xiâm hnê ngăn tơnêi têa tối, mâu kơ koan tơrŭm cheăng dêi Việt Nam kô veăng kum vâ Kăn teăng mâ pê klêi hnoăng cheăng ki hiăng pơcháu; veăng ‘no hnoăng mơnhông péa tơnêi têa.

Tơdah Kăn teăng mâ Lếo, jâ  Khamphao Ernthavanh, pôa Võ Văn Thưởng  tối, tơrŭm cheăng pơla Việt Nam - Lếo cho tơdroăng ki kal tung tơrŭm cheăng pơla péa pâ, môi tuăn dêi rơpó pơla mâu kăn pơkuâ dêi péa tơnêi têa cho xiâm ki vâ pro krá kak , mơjiâng ƀă tơrŭm, chiâng tơmeăm khoăng tơdjuôm ki kơnía git dêi tâi tâng hdroâng mơngế. Pôa Võ Văn Thưởng, Kăn xiâm hnê ngăn tơnêi têa tối, mâu kơ koan tơrŭm cheăng dêi Việt Nam kô mơ-eăm veăng kum, tơrŭm vâ Kăn teăng mâ pê klêi hnoăng cheăng ki hiăng pơcháu.