Klêi tơniăn lĕm rôh lăm pôu Hngêi khôp xiâm Vatican, tơpui tơno ƀă Bok Papa Francis, kơxo hâi lơ 7/8, pôa Võ Văn Thưởng, Kăn xiâm hnê ngăn tơnêi têa hiăng troh lăm pôu, trâm Hô̆i đong khu Ƀok xối kân Việt Nam a Ƀơrô Hô̆i đong Khu ƀok xối kân Việt Nam Pơlê kong kân Hồ Chí Minh. Kố cho rôh apoăng, pôa Võ Văn Thưởng, Kăn xiâm hnê ngăn tơnêi têa lăm pôu Hô̆i đong khu Ƀok xối kân Việt Nam drêng to pro Kăn xiâm hnê ngăn tơnêi têa.

Tối tơbleăng drêng klêi lăm pôu Hngêi khôp xiâm Vatican, Kăn xiâm hnê ngăn tơnêi têa ăm ‘nâi hiăng tơpui ƀă Ƀok Papá Francis, pêi cheăng ƀă Ngế pro xiâm hnê ngăn Hngêi khôp xiâm, Ƀok Cadinal Pietro Parolin, châ hên kuăn pơlê ki tiô khôp tung lâp tơnêi têa  tơmâng vâ ‘nâi plĕng.

Tơdroăng tơpui tơno pơla pôa Võ Văn Thưởng, Kăn xiâm hnê ngăn tơnêi têa ƀă Ƀok Papa Francis ton tâ tiô tơdroăng tối hdrối. Ƀok Papa xuân hiăng vâ môi tuăn pơtroh kơthô ăm kuăn pơlê Việt Nam. Ƀok Xối kân Nguyễn Năng, Ngế xiâm pơkuâ khu Ƀok xối kân ƀă mâu ƀok xối tối, kuăn pơlê ki tiô khôp Pâ Xeăng thế đi đo rêh ối lĕm tro ‘na châ ƀă ‘na mơhúa, rak tiah rơkong Êbiang hnê, pêi pro tro tiô tơdroăng Khu pơkuâ ngăn ‘na tơdroăng khôp, Ƀok Papa hnê kuăn pơlê, rêh ối lĕm tro ƀă mơjiâng tơnêi têa tơniăn. Khu xiâm pơkuâ tơdroăng khôp Pâ Xeăng púi vâ kuăn pơlê ki tiô khôp Pâ Xeăng veăng pêi hên tâ nếo mâu tơdroăng cheăng ‘na hnê hriâm, ngăn pơkeăng, khăm pơlât, tơdroăng kum tung rêh ối, ing mê, veăng ‘no hnoăng hên tâ nếo vâ tŏng kum ăm pơlê pơla.