Hvái ngăn troăng prôk lối 30 hơnăm péa tơnêi têa mơjiâng tơrŭm cheăng tơpui kâ, kăn xiâm hnê ngăn tơnêi têa tối nhên, Việt Nam ƀă Kazakhstan ai tŭm mâu tơdroăng vâ chiâng mâu ngế pú ki lĕm tung mơnhông mơdêk nếo.

Tơpui a rôh po ôu kâ, pôa Võ Văn Thưởng, Kăn xiâm hnê ngăn tơnêi têa tối nhên, péa tơnêi têa hâk tơngăm ‘na tơrŭm tơroâ, tơrŭm achê, tơrŭm pơla péa pâ ôh tá la lâi pơtê tơdroăng tơbêng, rế hía rế châ ‘mâi mơnhông ƀă mơdêk.

Ƀă tơdroăng tung rôh lăm pôu kố, kăn pơkuâ péa tơnêi têa hiăng môi tuăn mâu tơdroăng tơmiât ki kal vâ mơdêk tơrŭm cheăng pơla péa tơnêi têa, kăn xiâm hnê ngăn tơnêi têa tơngah, ƀă hiâm mơno ƀă tơdroăng hnê mơhno rơkê dêi kăn xiâm pơkuâ péa tơnêi têa, mâu hlá mơ-éa tơrŭm cheăng ƀă tơkêa châ rơhéa tung rôh lăm pôu kố kô châ péa pâ tơbleăng tơƀrê, ăm tơrŭm cheăng pơla Việt Nam ƀă Kazakhstan rế hía rế mơnhông.