Drêng troh hâi leh mot hơnăm hriâm nếo 2023-2024, pôa Võ Văn Thưởng, Kăn xiâm hnê ngăn tơnêi têa pơtroh kơthô ăm kơvâ ngăn hnê hriâm.

Tung kơthô Kăn xiâm hnê ngăn tơnêi têa ai chêh: ‘’Đảng, Tơnêi têa pin đi đo pơkâ tơdroăng hnê hriâm cho tơdroăng ki má môi. Hnê hriâm, hriâm tâp mâu vâi o cho tơdroăng pêi pro tơdjuôm dêi hngêi trung -  rơpŏng hngêi ƀă pơlê pơla. Môi tơnêi têa vâ mơnhông mơdêk thế ai tơdroăng hnê hriâm tơƀrê ƀă ‘no liăn hên ăm kơvâ hnê hriâm cho ‘no liăn mơnhông mơdêk krá tơniăn.

A púi vâ, Thái kô đi đo rak tơniăn tơdroăng hâk vâ, git tá hiâm mơno ƀă tơdroăng cheăng hnê hriâm, mơ-eăm tơkâ luâ xơpá tŭm tơdroăng, xơpá, veăng ‘no hên hnoăng tâ nếo ăm tơdroăng hnê mơngế ki kơnía git. A púi vâ mâu nôu pâ, xua tung la ngiâ kuăn ‘nĕng tơná, thế rơtế ƀă nôu pâ ƀă pơlê pơla tung hnê  hriâm, tơmâng khât kơ vâi o. A pâ thế rêm râ, khu tơrŭm cheăng Đảng, mâu kăn tơmâng khât tâ nếo tơdroăng hnê hriâm ƀă mâu luât pơkâ teăm tơdrêng ƀă tro, mơjiâng tơdroăng hnê hriâm cho tơdroăng ki lĕm tro, rơdêi, tơniăn, vâ mâu thái cô ƀă hok tro, sinh viên châ hnê hriâm ƀă hriâm tung hiâm mơno pêng tơdroăng phiu ro, hơniâp, châ pơtối rak ki ‘nâi hriĕn plĕng, veăng ‘no hnoăng ki kal tung pêi klêi tơdroăng pơ’lêh nếo ƀă tŭm tâi tâng ‘na hnê hriâm tơnêi têa’’.