Tung kơthô ai chêh, “Trung thu cho Têt dêi mâu vâi o phô̆m vâ xông kân. Rêm rôh Trung thu, mâu vâi muăn châ rơtế ƀă dêi rơpó xah hêi, rơtế ƀă nôu pâ, jâ pôa tơkŭm ối ƀă dêi rơpó a kơƀeăng ki ‘măn kế kâ a kong măng khế mơniâ, rơtế châ hlo ki kơnía ‘na nhŏng o, păn roăng mâu tơdroăng ki hơniâp ro ối tơxĭn, lĕm dêi hơnăm ối kŭn.

Trung thu xuân cho Têt dêi tơdroăng pâ nhuô̆m ƀă veăng kum mâu ngế ki xơpá, cho rôh vâ mâu ngế ki hiăng kân pơchân tối dêi tơná athế tơmâng ngăn hên tâ troh vâi hdrêng ƀă tơdroăng pâ nhuô̆m, ƀă mâu tơdroăng pêi pro ai pơxúa. Malối cho tơmâng ngăn troh vâi muăn ki ai tơdroăng rêh ối xơpá, mâu vâi muăn kuăn tê, mâu vâi muăn a kơpong hngế hngo, kơpong tơkăng kong, chuăn rơlố ƀă hên mâu tíu ki ê vâ rêm ngế vâi hdrêng châ tơdah Têt Trung thu hơniâp ro, châ hriâm tâp, rơkê plĕng ƀă hơniâp ro tung tơdroăng ki pâ nhuô̆m dêi rơpŏng hngêi, pơlê pơla.

Á briê ƀă hâk tơngăm drêng tung pơla hdrối kố nah, mâu vâi muăn hiăng ai tơdroăng ki hơ’lêh rơkê, pêi hên tơdroăng cheăng ki tro, hlê plĕng ƀă nôu pâ, jâ pôa, ‘nâi kum ƀă veăng kum mâu ngế ki pá tâ tơná. Á rơhêng vâ mâu vâi muăn đi đo păn roăng mâu tơdroăng tơmiât lĕm, pâ nhuô̆m rơpŏng hngêi, loi nguăn, ‘nâi tơrŭm, tŏng kum dêi rơpó, tơ’noăng pêi rơpâu tơdroăng lĕm, tơxâng cho kuăn nguăn, hok tro rơkê, cho muăn loi Pôa Hồ.

Kơxo hâi lơ 27/9, jâ Võ Thị Ánh Xuân, Kăn xiâm phŏ hnê ngăn tơnêi têa, Kăn xiâm hnê ngăn Hô̆i đong rak Liăn ‘măn kơdĭng kum vâi hdrêng Việt Nam hiăng troh lăm pôu hbru tơmeăm ăm vâi hdrêng a Tíu pêi cheăng tŏng kum kong pơlê Dak Lak. Akố, jâ Võ Thị Ánh Xuân, Kăn phŏ hnê ngăn tơnêi têa hiăng lăm pôu, hơlêm ƀă hbru tơmeăm cho kơƀăn trung thu ăm vâi o 50 rơtuh liăn ăm Tíu xiâm tŏng kum dêi kong pơlê Dak Lak vâ veăng tơlo liăn kum mâu vâi o kơtiê xơpá ki ôh ta mơhúa dế hriâm tâp a kố.

Jâ Võ Thị Ánh Xuân khĕn kơdeăn ƀă tối mâu tơdroăng hiăng châ pêi pro dêi mâu kăn ƀô̆, mâu ngế pêi cheăng a Tíu xiâm tŏng kum dêi kong  pơlê Dak Lak tung mâu hnăm hdrối. Mâu tơdroăng cheăng pêi dêi Tíu xiâm hiăng veăng mơhno mâu troăng rơhlâ tro ‘na tơdroăng rêh ối dêi Đảng, Tơnêi  tung tơdroăng rak ngăn ivá, păn roăng mâu hơnăm hiăng krâ ki ôh tá ai ngế păn roăng, mâu vâi hdrêng kuăn tê, châi tamo ki ôh tá ai ngế chĕm mơ’rêh.