Chêh tơbâ a Tíu xối tơbâ kơ Pôa, Kăn xiâm hnê ngăn tơnêi têa tối đi đo pâ hnoăng ki kân dêi Pôa Hồ Chí Minh - Kăn xiâm hnê ngăn tơnêi têa ki apoăng rơkê kân. Ngin kuăn cháu ôh tá la lâi pơtê hriâm, pêi pro tiô tơdjâ tuăn mơno, túa pêi cheăng ki lĕm tro dêi Pôa; Tơrŭm môi tuăn mơ-eăm, “Mơjiâng môi Việt Nam Hơniâp lĕm, lâp tơnêi têa tơrŭm môi, tơniăn, tro tuăn kuăn pơlê ƀă kro mơdrŏng, veăng ‘no hnoăng tơxâng a tơdroăng cheăng kăch măng lâp plâi tơnêi’’ tiô Tơdroăng Pôa chêh tối pơchân hdrối vâ hlâ.

Tơbâ rôh má 54 hâi Pôa Hồ prôk hơngế, 54 hơnăm pêi pro tiô tơdroăng Pôa chêh tối pơchân hdrối vâ hlâ xuân cho rôh vâ tâi tâng Đảng, tâi tâng kuăn pơlê ƀă tâi tâng mâu lêng pâ troh ƀă pâ hnoăng ki kân dêi Pôa ƀă kuăn pơlê Việt Nam. Kố xuân cho rôh vâ tâi tâng mâu vâi pú, kuăn pơlê pơtối mơdêk hriâm ƀă pêi pro tiô troăng rơhlâ hiâm mơno Hồ chí Minh.

Ing mê, tơ’nôm tuăn loi ƀă púi vâ mơ-eăm dêi hdroâng kuăn ngo vâ mơjiâng tơnêi têa Việt Nam khên tơnôu, rơtá ƀă dêi rơpó mâu kong têa vâi pú lâp plâi tơnêi tung la ngiâ môi tiah púi vâ dêi Pôa Hồ Chí Minh - Kăn xiâm hnê ngăn tơnêi têa ki ahdrối.