Kăn teăng mâ – pôa Antonio Alessandro mơnê mâu kơ koan ki ai tơdjâk dêi Việt Nam hiăng tơrŭm, tŏng kum vâ kăn teăng mâ pêi klêi dêi hnoăng cheăng, veăng kum mơdêk tơrŭm cheăng pơla péa tơnêi têa. Pôa Võ Văn Thưởng, Kăn xiâm hnê ngăn tơnêi têa ăm ‘nâi, mâu tơdroăng ki pêi pro klêi tung tơrŭm tơroâ, tơrŭm cheăng dêi Việt Nam – Italia hiăng châ pêi pro tơƀrê ƀă tối nhên hên hdroh tung mâu rôh tơpui tơno, trâm mâ pơla mâu kăn pơkuâ péa tơnêi têa tung rôh lăm pôu ki achê kố.

Kăn xiâm hnê ngăn tơnêi têa tối tiah kố, maluâ xo hnoăng cheăng a Việt Nam tung rôh ki xơpá xua pơreăng kân COVID-19, la ƀă tơdroăng mơ-eăm dêi kăn teăng mâ, veăng kum rak vế tơrŭm cheăng, tơrŭm pơla péa tơnêi têa, rơtế tŏng kum dêi rơpó tơkâ luâ xơpá ƀă pơtối pêi châ tơƀrê mâu tơdroăng ki tơniăn lĕm ing tơdroăng xơpá mê, Việt Nam ƀă Italia rế mơhno nhên hiâm mơno pú hmâ tơdrăng khât ƀă dêi rơpó.