A roh tơdah, Kăn xiâm hnê ngăn tơnêi têa rơkâu Kăn teăng mâ pôu râng tâi tâng hnoăng kong têa Bangladesh hiăng pêi kêi đeăng rơkê tung pơla 6 hơnăm pêi cheăng a Việt Nam; kheăn kơdeăn mâu tơdroăng veăng kum lĕm ‘nâng ƀă châ tơƀrê dêi jâ Samina Naz tung tơdroăng pro trâu hơngế tơ’nôm tơrŭm nhŏng o ƀă tơrŭm cheăng pơla Việt Nam – Bangladesh tung pơla kố nah.

Kăn xiâm hnê ngăn tơnêi têa loi tơngah mơhé pôu râng hnoăng cheăng ki lâi, Kăn teăng mâ kô pơtối ăm mâu tơdroăng tuăn pâ ki lĕm ‘na tơnêi têa, kuăn mơngế Việt Nam, đi đo cho ngế pú hmâ achê, đi đo veăng kum ƀă thăm mơnhông tơrŭm cheăng pơla Việt Nam ƀă Bangladesh.

Tối tơnêi ki lôi chúa tung tơrŭm cheăng ối hên, Kăn xiâm hnê ngăn tơnêi têa pơkâ thế péa tơnêi têa thăm tơrŭm tung la ngiâ, ki má lối cho tơpui tơno râ kăn xiâm ƀă mâu râ vâ ing mê, mơnhông tơrŭm tâi tâng.