A rôh tơdah Kăn hnê ngăn Grup Huawei Lương Hoa, pôa Võ Văn Thưởng, Kăn xiâm hnê ngăn tơnêi têa tối nhên, tung pơla pêi cheăng pơ’lêh kơxô̆ ƀă mơnhông cheăng kâ kơxô̆ tung lâp plâi tơnêi mơnhông tơƀrê rĕng. Việt Nam nhoăm ƀă tơkŭm pơ’lêh kơxô̆, mơjiâng cheăng kâ kơxô̆ ƀă rêh ối kơxô̆. Việt Nam krếo tơrŭm cheăng pơla péa pâ, sap râ Chin phuh ta troh râ mơdró krê dêi kuăn pơlê veăng kum, tơrŭm, ‘no liăn mơjiâng tơmeăm khoăng kơxô̆, pê klêi luât pơkâ mơnhông mơdêk kơxô̆.

Tơdah pôa Lý Tự Học, Kăn hnê ngăn Grup Trung Hưng (ZTE), pôa Võ Văn Thưởng, Kăn xiâm hnê ngăn tơnêi têa khĕn kơdeăn hnoăng cheăng pêi dêi Khu mơdró ZTE ƀă tơdroăng hiăng klêi tơrŭm cheăng tê mơdró dêi ZTE a Việt Nam, cho khu ki tơrŭm cheăng kân má môi ƀă hên mâu tơmeăm khoăng ‘na troăng hyôh phôn Việt Nam.

Kăn xiâm hnê ngăn tơnêi têa khĕn kơdeăn tơdroăng mâu khu ‘no liăn cheăng dêi Sinuâ hiăng tơbleăng pêi lối 4 rơpâu tơdroăng tơkêa bro ki ối xêt a Việt Nam ƀă tâi tâng kơxô̆ liăn chêh inâi veăng lối 26 rơtal dollars. Tung mê, ZTE hiăng ai mâ a Việt Nam sap ing hên hơnăm kố. Kăn xiâm hnê ngăn tơnêi têa loi khât, ZTE kô tơrŭm cheăng krá, pơxúa tâ ƀă mâu khu mơdró a Việt Nam tung la ngiâ; veăng hno hnoăng mơnhông tơdjuôm tung tơrŭm cheăng pơla Việt Nam - Sinuâ.