Kơxê lơ 22/8, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa tơdah jâ Viengthong Siphandon, Kăn xiâm pơkuâ Đảng Nhân yân Kăch măng Lếo, Kăn xiâm pơkuâ Hngêi tơleăng xiâm kong têa Lếo dế ai roh lăm pôu ƀă pêi cheăng a Việt Nam.

Pôa Võ Văn Thưởng, Kăn xiâm hnê ngăn tơnêi têa koh phiu ro jâ Viengthong Siphandon ƀă Khu râ kăn xiâm Hngêi tơleăng xiâm kong têa Lếo troh lăm pôu, pêi cheăng ƀă Hngêi tơleăng xiâm Việt Nam; loi tơngah roh lăm pôu pêi cheăng kô thăm krá tơniăn tâ tơrŭm cheăng pơla péa Hngêi tơleăng xiâm péa tơnêi têa; tơdrêng amê, kum thăm tơrŭm cheăng nhŏng o, rŭm môi tuăn ki má môi, tơrŭm cheăng tŭm têk Việt Nam – Lếo.

Tối tơdroăng ƀă Kăn xiâm hnê ngăn tơnêi têa ‘na tơdroăng châ tơƀrê tơpui tơno ƀă pôa Nguyễn Hòa Bình, Kăn xiâm pơkuâ Hngêi tơleăng xiâm Việt Nam, jâ Viengthong Siphandon tối ăm ‘nâi, péa pâ hiăng tơpui tơno mâu tơdroăng xiâm, pơkâ troăng tơrŭm cheăng; môi tuăn pơtối mơnhông mơdêk, pơtối tơdroăng châ tơƀrê dêi ‘’Hơnăm rŭm môi tuăn nhŏng o Việt Nam – Lếo, Lếo – Việt Nam’’.

Péa pâ xuân môi tuăn pơtối mơnhông khôi túa lĕm tro dêi tơdroăng tơrŭm cheăng ki má môi Việt Nam – Lếo ki mâu rơxông kăn pơkuâ péa tơnêi têa hiăng mơ’no ivá pêi pro.