Kăn xiâm hnê ngăn tơnêi têa rơkâu mâu Kăn teăng mâ tơdah hnoăng cheăng a Việt Nam, pói vâ mâu Kăn teăng mâ ƀă túa ki rơkê tơtro ‘nâi plĕng hên dêi tơná, veăng kum mơdêk tơrŭm cheăng pơla Việt Nam ƀă mâu kong têa. Tơdah Kăn teăng mâ Bulgaria, Kăn xiâm hnê ngăn tơnêi têa tối, Việt Nam ƀă Bulgaria cho khu tơrŭm cheăng ki kal ƀă pơkâ péa tơnêi têa đi đo tơpui tơno khu râ kăn xiâm ƀă mâu râ, trâm mâ tơpui tơno râ kong pơlê ƀă trâm mâ tơpui tơno kuăn pơlê, ing mê, mơjiâng xiâm kối krá tơniăn ăm tơrŭm cheăng péa tơnêi têa.

Xua mê, péa tơnêi têa kal pơtối mơdêk tơrŭm cheăng ƀă môi tuăn kum dêi pó tung mâu hneăng hôp tơpui tơno lâp plâi tơnêi ƀă hên troăng. Tơdah Kăn teăng mâ Kŏng hoa Pơhlăng, Kăn teăng mâ kong têa Pơhlăng tối ƀă pôa Võ Văn Thưởng hiâm mơno hâk tơngăm châ tơdah hnoăng cheăng a Việt Nam tung pơla tơrŭm cheăng nhŏng o pơla péa tơnêi têa mơnhông mơdêk lĕm. Tung la ngiâ, Pơhlăng kô mơdêk tơrŭm cheăng ƀă Việt Nam ‘na khoa hok, hnê hriâm, ki má lối cho hnê hriâm đăi hok.