A rôh tơpui tơno, péa pâ hiăng rơtế tơpui tơno mâu troăng hơlâ pêi pro ki nhên vâ tơbleăng tơkêa dêi Kăn pơkuâ kân má môi dêi péa Đảng, péa tơnêi têa, pơtối mơdêk rơdêi ƀă pro trâu hngế tâ nếo tơrŭm cheăng, tơrŭm tung mâu kơvâ cheăng.

Kăn xiâm hnê ngăn tơnêi têa pơkâ thế, tung la ngiâ ah, péa pâ pơtối tơrŭm krá tơniăn, hbrâ rơnáu rơkê tro ăm mâu tơdroăng cheăng ki ăm mâu khu râ kăn xiâm; thăm mơdêk tơrŭm cheăng pơla mâu khu xiâm, kơvâ cheăng, kong pơlê pơla péa tơnêi têa; mơdêk tơrŭm tơƀrê tung mâu kơvâ cheăng, pơtối rak vế ivá mơnhông tơniăn lĕm tung tơrŭm cheăng kâ tê mơdró; pơkâ thế Sinuâ pơtối pro tơ’lêi hlâu po rơdâ roê ‘mot kế tơmeăm pêi lo ing chiâk deăng dêi Việt Nam, thăm mơdêk ‘no liăn pêi cheăng a Việt Nam ƀă mâu tơdroăng tơkêa ki kân ăm tơdroăng ki mơnhông mơdêk dêi Sinuâ.

A Bắc Kinh,  Sinuâ, pôa Võ Văn Thưởng, Kăn xiâm hnê ngăn tơnêi têa xuân hiăng tơdah Kăn xiâm hngêi rak liăn ngân ‘No liăn cheăng mơjiâng tơmeăm khoăng châu Á (AIIB) Kim lập Quần. A rôh tơdah, Kăn xiâm hnê ngăn khĕn kơdeăn AIIB hiăng ôh tá la lâi ptê po rơdâ tơdroăng cheăng, châ pêi hên tơdroăng ki  kal ƀă rế mơnhông hnoăng cheăng pêi dêi môi hngêi rak liăn mơnhông tơƀrê hên troăng, rơtế tơdjuôm ivá ƀă mâu khu tơrŭm mê cho WB, ADB... ăm liăn ai tiô tơdroăng kal vâ mơjiâng tơmeăm khoăng a kơpong châu Á, malối ƀă mâu kong têa dế vâ mơnhông tơ ƀrê.

Tung la ngiâ, Kăn xiâm hnê ngăn AIIB tơrŭm ƀă kơjo kum mâu ngế tung khu ki kal vâ hên ‘na luăn ƀă kŏng ngê̆; pơtối pro mâu tơmeăm khoăng tung kơpong châu Á. Tung mê, pêi ahdrối cho pêi cheăng rơdêi lĕm, mơdêk ivá cheăng tung hbrâ ví hyôh kong prâi hơ’lêh.