A rôh trâm mâ, pôa Võ Văn Thưởng, Kăn xiâm hnê ngăn tơnêi têa tối nhên, Việt Nam đi đo nhoăm tơdroăng tơrŭm cheăng pơkâ  Việt Nam - Lếo cho tơmeăm khoăng kơnía git, cho tơrŭm cheăng krá tơniăn, tung hriăn plĕng ki nếo tung mê ai tơrŭm cheăng lâp plâi tơnêi.

Péa ngế kăn xiâm hiăng vâ môi tuăn pơtối rak vế pêi tơƀrê mâu luât pơkâ trâm tơpui tơno, mơhno túa lĕm tro, tơ’noăng ivá ƀă ôm hyô; pêi tro Tơdroăng tơkêa pro mơdêk ki tơƀrê ƀă pơxúa tơrŭm cheăng Việt Nam - Lếo tung hnê hriâm ƀă hnê mâu ngế pêi cheăng  rơkê tung pơla hơnăm 2021-2030.

Pôa Thongloun Sisoulith, Kăn xiâm pơkuâ hnê ngăn Đảng - Kăn xiâm hnê ngăn tơnêi têa ăm ‘nâi, malối, Lếo ngăn nhoăm tơrŭm cheăng ƀă Việt Nam, đi đo mơ-eăm vâ mơnhông tơrŭm cheăng rế xông tơƀrê, môi tuăn dêi rơpó tung tơrŭm cheăng pơla Viêt Nam - Lếo pơtối mơnhông krá tơniăn, trâu rơdâ; kô đi đo mơ-eăm mơnhông tơrŭm pơla péa Đảng, péa tơnêi têa.

Xuân rôh kố, pôa Võ Văn Thưởng ƀă mâu kăn xiâm Việt Nam hiăng ai rôh trâm mâ mâu kăn ƀô̆, mâu ngế pêi cheăng dêi mâu kơ koan teăng mâ Việt Nam a Sinuâ.