Klăng roh leh tơbâ Hâi ngế tê mơdró Việt Nam 19/10, tơmiât pêi pro troh leh tơbâ 9 hơnăm hâi mơjiâng Khu vâi kơdrâi mơdró Việt Nam 19/10 ƀă Hâi vâi kơdrâi Việt Nam 20/10, kơxế lơ 5/10, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa trâm mâ Khu 90 ngế kơdrâi mơdró ki má môi dêi Khu vâi kơdrâi tê mơdró Việt Nam.

Tối nhên, Đảng, Tơnêi têa đi đo tơmâng, pro tơ’lêi hlâu ăm tơdroăng mơnhông mơdêk dêi khu tê mơdró Việt Nam, tung mê, ai kơdrâi tê mơdró, Kăn xiâm hnê ngăn tơnêi têa pói vâ Khu vâi kơdrâi tê mơdró Việt Nam đi đo cho tíu păn roăng, mơhnhôk tơdroăng pói vâ pro kro mơdrŏng ki lĕm dêi vâi kơdrâi, dêi vâi kơdrâi tê mơdró Việt Nam; ki rơhêng vâ tối mơhnhôk tơdroăng hâk vâ ó rơdêi ‘na tơdroăng mơ-eăm, mơhnhôk mâu pú hmâ hơnăm ối nếo pro kro mơdrŏng tơxâng.

Ƀă kơxô̆ vâi kơdrâi tơnêi têa pin châ 50% pơ’leăng mâ mơngế ƀă vâ chê 50% mơngế pêi cheăng cho kơdrâi, Kăn xiâm hnê ngăn tơnêi têa tối, kơxô̆ 8.000 ngế kơdrâi tê mơdró veăng Khu tê mơdró vâi kơdrâi tá hâi mơhno tâi ki ai hlâu dêi vâi kơdrâi tê mơdró Việt Nam. Xua mê, Kăn xiâm hnê ngăn tơnêi têa pói vâ Khu tơrŭm po rơdâ lâp lu 63 kong pơlê, pơlê kong kơdrâm.

Pôa Võ Văn Thưởng, Kăn xiâm hnê ngăn tơnêi têa pơkâ thế mâu ngế kơdrâi tê mơdró pơtối veăng tơpui tối kơdroh mâu mơ-éa ki hên hĭn pro tíu mơ’no liăn cheăng tê mơdró tơ’lêi hlâu tâ; veăng kum mơjiâng troăng hơlâ mơnhông mơdêk tơnêi têa.