A roh trâm mâ, péa ngế kăn xiâm pơkuâ tối phiu ro ‘na mâu tơdroăng châ tơƀrê ki kal tung tơrŭm cheăng pơla péa pâ tung pơla kố nah môi tiah rak tơpui tơno khu râ kăn xiâm ƀă mâu râ, mơdêk mâu kơvâ tơrŭm cheăng kâ – tê mơdró, cheăng lêng – gak kring, khoa hok – kŏng ngê̆, hnê hriâm – hnê mơjiâng, on tơhrik, trâm mâ kuăn pơlê. Pôa Võ Văn Thưởng kheăn kơdeăn ƀă mơnê pôa Putin, mâu kơ koan khu râ kăn pơkuâ, kong pơlê a Rusi hiăng tŏng kum mơjiâng um meăn Pôa Hồ Chí Minh a Saint Petersburg.

Kăn xiâm hnê ngăn tơnêi têa pói vâ Rusi pơtối ăm hnoăng liăn hriâm rơkê ăm sinh viên Việt Nam troh hriâm tâp a Rusi xuân môi tiah thăm trâm mâ mơhno khôi túa lĕm tro, trâm mâ kuăn pơlê. Pôa Vladimir Putin mơnhên Việt Nam cho môi tung mâu khu tơrŭm cheăng ki kal má môi dêi Rusi a kơpong châu Á – Thái Bình Dương, pơtối mơnhông mâu troăng pơkâ pêi, tơdroăng tơrŭm tê mơdró, mơ’no liăn cheăng pơla péa pâ ƀă hên pâ, thăm tơrŭm pơla mâu khu xiâm, kơvâ cheăng, kong pơlê dêi péa tơnêi têa.