Tơplôu: Gương - A Sa Ly/VOV Tây Nguyên
A kơpong Tây Nguyên, vâ chê 1 rơtuh 400 rơpâu ngế hok tro mâu râ xuân hâk phiu troh hngêi trung pơxiâm mot hơnăm hriâm nếo. Tung mê, kong pơlê Dak Lak ai 500 rơpâu ngế hok tro, Gia Lai ai 368 rơpâu ngế hok tro, Lâm Đồng ai 334 rơpâu ngế hok tro, Dak Nông ai 185 rơpâu ngế hok tro ƀă Kon Tum ai 166 rơpâu ngế hok tro.
Ki rơhêng vâ tối, thái cô ƀă hok tro Hngêi trung hdroâng kuăn ngo ai tíu kâ koi ối pơtê kong pơlê Gia Lai hâk phiu tơdah pôa Võ Văn Thưởng, Kăn xiâm hnê ngăn tơnêi têa troh veăng leh pơxiâm po hơnăm hriâm nếo. Kăn xiâm hnê ngăn tơnêi têa mơnhên: ‘’Ing toăng hngêi trung tuăn pâ hâk vâ kố, rơpâu ngế hok tro kuăn ‘nĕng hdroâng kuăn ngo Bơhnéa, Jarai, Thái, Nùng, Tày, Rơđế, Rơteăng... hiăng xông kân, veăng kum mơngế pêi cheăng ki rơkê kum tung tơdroăng mơnhông cheăng kâ – rêh ối pơlê pơla, tơniăn cheăng lêng, gâk kring dêi kong pơlê. Tung kơxô̆ mê, hên hok tro dêi hngêi trung hiăng chiâng kăn ƀô̆ pơkuâ mâu râ kong pơlê.
Roh kố, pôa Nguyễn Kim Sơn, Ngế xiâm pơkuâ hnê hriâm ƀă Hnê mơjiâng tuăn ngôa rơkê hiăng ai roh pêi cheăng ƀă Khu pơkuâ hnê hriâm ƀă hnê mơjiâng tuăn ngôa rơkê kong pơlê Gia Lai. A kố, pôa Nguyễn Kim Sơn pơkâ thế kơvâ hnê hriâm kong pơlê tơmâng troh tơdroăng pơ’lêh nếo hnê hriâm, tơtrŏng tơmâng tŏng kum, pro tơ’lêi hlâu vâ khu thái cô dêi kong pơlê hmiân tuăn, loi tơngah, hâk vâ tung hnê tơdroăng hnê hriâm phôh thông nếo.
Kơxo hâi lơ 5/9, pôa Nguyễn Trọng Nghiã, Ngế ngăn ‘na hnê mơhnhôk cheăng kal kí xiâm tơnêi têa hiăng troh veăng leh hiăng pro klêi têa krúa a rơlố Tân Phú Đông, kong pơlê Tiền Giang. Pôa Nguyễn Trọng Nghiã tối pơchân mâu kăn ƀô̆, thái cô ƀă hok tro kong pơlê Tiền Giang tối tơdjuôm ƀă hngêi trung râ má péa Tân Phú tối krê kal thế mơdêk tơdroăng hnê ƀă hriâm veăng mơnhông tơdroăng hnê mơngế rơkê ăm tơnêi têa.
Rêm râ ủy, mâu kăn kong pơlê thế hlê plĕng troăng rơhlâ hnê hriâm - hnê mơjiâng tuăn ngôa rơkê dêi Đảng - Tơnêi têa, ƀă rơkong hnê dêi Pôa Hồ, pơtối tơmâng khât, pro tơ’lêi hlâu ăm tơdroăng hnê hriâm; kal tơrŭm hnê chư ƀă hnê tơdroăng rêh ối lĕm, hnê tơdroăng pâ nhoăm tơnêi têa.
Viết bình luận