Tơbleăng a hâi leh, pôa Võ Văn Thưởng - Kăn xiâm hnê ngăn tơnêi têa tối nhên, tơdroăng hmâ pêi pro ing ton nah rơtế ƀă tơnêi têa, kuăn mơngế kong pơlê Quảng Ninh, cho tíu ki xiâm dêi tơnêi têa; tíu ki ai kroăng Bặch Đằng, hdró tơdroăng ton nah dêi hdroâng kuăn ngo pái hdroh plâ ƀlêi trâng xâ ki tơbriât pơkuâ.

Kăn xiâm hnê ngăn tơnêi têa khĕn kơdeăn Đảng ƀộ, mâu kăn ƀă kuăn pơlê dêi kong pơlê Quảng Ninh tung pơla pơtối mơdêk hnoăng cheăng pêi dêi kuăn pơlê  kong pơlê Quảng Ninh tung mâu hơnăm hdrối pơtối mơdêk tơdroăng môi tuăn, khên tơnôu mơ-eăm mơdêk rơkê plĕng, hriăn plĕng ki nếo, pro hên hnoăng cheăng ki kân.

Tơdroăng cheăng kâ mơnhông mơdêk (GRDP) hên ƀă tơniăn, đi đo tung 8 hơnăm hlối, sap hơnăm 2016 xuân tâk lối 10%; xo liăn ngân tơnêi têa cho tung khu ki hên má môi tung lâp tơnêi têa. Quảng Ninh hiăng pê klêi tơdroăng mơjiâng thôn pơlê nếo a 3 râ; ối má môi hdrối 3 hơnăm tơdroăng pêi pro tiô pơkâ tơnêi têa xăm kơtiê krá tơniăn pơla hơnăm 2021- 2025. Tơdroăng mơjiâng, ’mâi hơ’lêh Đảng ƀă tơdroăng kal kí đi đo châ tơmâng, ƀă ai hên tơdroăng pơ’lêh nếo.