VOV4.Xơ Đăng - Hâi lơ 26/5, pôa Võ Văn Thưởng, Kăn pơkuâ hnê mơhno má môi cheăng Đảng hiăng tơpui tơno mơ’no tơdrêng tung um tiô troăng hyôh măng ƀă pôa Roberto Morales Ojeda, Kăn xiâm pơkuâ hnê mơhno Đảng Kŏng san kong têa Cuba. Pôa Võ Văn Thưởng hiăng tối mâu tơdroăng châ tơƀrê tung tơdroăng hbrâ mơdât pơreăng, mơnhông cheăng kâ dêi Việt Nam, mơ-eăm hlê plĕng tŭm ƀă pêi pro Pơkâ Hneăng hôp roh má XIII dêi Đảng.

Pôa Roberto Morales Ojeda rơkâu mâu tơdroăng châ tơƀrê Việt Nam hiăng châ tơƀrê tung pơla kố nah, tối loi tơngah ing pơkuâ hnê mơhno dêi Đảng Kŏng san Việt Nam, kuăn pơlê Việt Nam nhŏng o kô pêi pro ƀlêi trâng mâu pơkâ ki Hneăng hôp má XIII dêi Đảng Kŏng san Việt Nam hiăng pơkâ mơ’no.

Pôa Roberto Morales Ojeda xuân tối ‘na mâu troăng pêi ton xŏn, troăng hơlâ tung mâu kơvâ cheăng klêi kơ’nâi môi hơnăm pêi pro pơkâ Hneăng hôp roh má VIII dêi Đảng Kŏng san Cuba, troăng pơkâ pêi, troăng hơlâ tơpui kâ ƀă kong têa ê dêi Cuba ƀă mâu tơdroăng kơjo mơnhông mơdêk cheăng kâ – rêh ối pơlê pơla tung la ngiâ.

A Sa Ly tơplôu ƀă tơbleăng