VOV4.Xơ Đăng - Mâu khu xiâm, kơvâ cheăng, kơ koan Tơnêi têa kal ai troăng hơlâ pêi pro kơtăng tâ vâ mơdêk ‘no liăn cheăng tơdjuôm, khŏm mơ-eăm ‘mâi rơnêu tơdroăng ki ai mâu tơdroăng tơkêa tá hâi châ hbrâ rơnáu nhên ‘na hồ sơ drêng ăm tơdroăng tơkêa ‘no liăn cheăng tơdjuôm”. Kố cho tơdroăng pơkâ thế dêi pôa Vũ Đức Đam, Ngế pro xiâm phŏ hnê ngăn tơnêi têa, Tôh trưởng Tôh pêi cheăng kơxô̆ 3 a rôh hôp ‘na séa ngăn, pơkâ tơleăng xơpá, mơdêk tơdroăng ki ‘no liăn cheăng tơdjuôm hơnăm 2022 drêng pêi cheăng ƀă mâu Khu xiâm, kơvâ cheăng, kơ koan Tơnêi têa po a hâi lơ 17/5 a Hà Nội.

Tiô tối tơbleăng dêi Khu xiâm pơkâ ƀă ‘no liăn cheăng, tâi tâng tơdroăng pơkâ ‘no liăn cheăng tơnêi têa hơnăm 2022 châ pcơháu ăm mâu khu xiâm, kơvâ cheăng tơnêi têa tiô riân ‘no dâng 464 rơtal liăn, châ 3,86% túa pơcháu hơnăm 2022, iâ tâ kơlo tơdjuôm tung lâp tơnêi têa ai 20,27%, tung mê, ai 13 tíu pêi cheăng tiô tối hdrối kô ‘no liăn iâ tâ pá xôp 10%.

Kăn pơkuâ mâu khu xiâm, kơvâ cheăng, kơ koan Tơnêi têa tối tiah kố: vâ mơdêk luât ‘na ‘no liăn cheăng tơdjuôm, tơnêi tơníu, mơjiâng ƀă luât ai tơdjâk troh tiô tơdroăng ki xing xoăng rêm râ, kơdroh chêh pro hlá mơéa ‘na ‘no liăn cheăng, ‘no liăn vâ teăm pơkâ tơleăng mâu tơdroăng tơvâ tơvân, mơdêk ‘no liăn cheăng tơdjuôm.

Katarina Nga tơplôu ƀă tơbleăng